Við lifum í samfélagi idíóta!

Er hægt að segja eitthvað annað í dag en að flestir einstaklingar á mínu reiki séu idíótar.  Með orðinu idíóti á ég við þá merkingu sem Grikkir gáfu því þegar lýðræði þeirra var í startholunum.

Það sannast á því hversu grunnhyggnir og fáfróðir flestir unglingar eru.  Þeir geta með naumindum nefnt í hvaða heimsálfu Ísland er og hvað forseti Bandaríkjanna heitir ef eitthvað er að marka reglulegar kannanir Blaðsins.  Dýpra nær viskan ekki, hvað þá skilningur á þeim málum sem viðkoma tveimur fyrrnefndum atriðum. 

Í bókinni 1984 eftir George Orwell hamrar Flokkurinn svokallaði, sem er einvaldur í Eyjaálfu, á því að Stríð sé friður, Frelsi sé ánauð og að Fáfræði sé máttur.  Svo virðist sem að þessi gildi hafi tekið sér bólfestu í idíótakynslóðinni.  Bandaríkin fara í stríð til að koma friði á í Írak, frelsið er keypt dýru verði því allsstaðar í heiminum er í sífellu verið að auka heimildir hinna og þessa stofnana til að rjúfa friðhelgi einkalífsins.  Og síðast en þó ekki síst virðist idíótahátturinn vera að yfirgnæfa rödd heilbrigðrar skynsemi og að enginn sé maður með mönnum ef hann þekkir fleiri en tvo þingmenn með nafni.

Svo ég haldi áfram að tala um bókina 1984 þá virðist sem sumir íslenskir stjórnmálamenn lifi eftir reglum Stóra Bróðurs.  Í bókinni segir að Eyjaálfa sé alltaf annað hvort í stríði við Evrasíu eða Austasíu.  Því er haldið fram að það land sem Eyjaálfa er í stríði við á hverjum tímapunkti hafi alltaf verið í stríði við Eyjaálfu.  Í þessu felst þó nokkur þversögn en máttur fáfræðinnar og tvíhyggja virðist gera íbúum Eyjaálfu kleit að gefa skít í þetta. 

Vinstri Græn, svo ég hafi nú reglur jafnréttis í heiðri, virðast aðhyllast tvíhyggju.  Og það gerir mannfjöldinn líka.  Á meðan hver sveitastjórnareinstaklingur á fætur öðrum, og jafnvel sjálfur formaðurinn styður stóriðju og heilbrigða atvinnuuppbyggingu, hvort sem það er á Húsavík eða  í Mosfellsbæ, hrópar Steingrímur Jóhann Sigfússon af pöllum Alþingis að flokkurinn sé á móti hverju einasta púströri sem gerir okkur kleift að aka um landið okkar. 

Vinstri Græn eru næststærsti flokkurinn samkvæmt skoðanakönnunum vegna umhverfismála sinna.  Vinstri Græn nýta sér tvíhyggju.  Þeir eru bæði með og á móti allri stóriðju.  Af þessu leiðir að Vinstri  Græn eru næststærsti flokkurinn á Íslandi vegna stefnuleysis og óreiðu í aðalstefnumáli sínu.  Vinstri Græn eru næststærsti flokkurinn vegna þess að fáfræði fólksins er þeirra máttur, þeirri keppikefli.

Er fjórðungur Íslendinga hálfvitar?

Ég bara spyr....

Athugasemdir

[Stefán Friðrik Stefánsson, 19.3.2007 kl. 20:40]

Sæll nafni

Gott að fá þig sem bloggvin.

Góðar pælingar hjá þér. Var gaman að lesa.

mbk.

[Eyþór Eðvarðsson í Vilnius, 20.3.2007 kl. 12:22]

Sómi Íslands, sverð og skjöldur! Sannur heiður að eiga svo gagnorðan og hugsandi mann sem bloggvin!