Leiðindi

Ég er laus úr viðjum ánuðar þeirrrar sem dagvistun grunnskólanna er.  Ég brenndi allar brýr forræðishyggjunnar að baki mér og í stað þess að eyða dögum mínum í einni og einni kennslustund með mörg hundruð mínútna millibili við þá iðju að fylgjast með atómhreyfingum sesíns hef ég hafið vinnu hjá Vélaleigu AÞ ehf.  Þar uni ég hag mínum vel við gatnaframkvæmdir í Vogunum frá morgni til kvölds og brýt daginn í tvennt með heimsókn í Matstofu Kópavogs.  Ég fullyrði það staðfastlega og stend við stóru orðin að þar sé besti heimilismatur á Íslandi, eða að minnsta kosti við Smiðjuveg.

En aftur að dagvistun grunnskólanna.

Það er staðreynd að skóladagatalið hefur stækkað á síðustu misserum og þarf ekki að fara lengra en til ársins 1997 þegar undirritaður hóf skólagöngu sína til að sjá breytinguna.  Þá hófst skólinn 1. september og lauk 31. maí.  Árið 2006 hófst skólinn 22. ágúst og lýkur 7. júní.  Hefur verið bætt við námsefnið síðan þá?  Ég ætla ekki að fullyrða neitt um það en ég efast stórlega.  Það vekur hins vegar athygli mína að inn í skóladagatal hefur verið troðið alls konar þemadögum.  Ég ætla ekki að mæla gegn þemadögum í sjálfu sér, heldur mæli ég gegn þemadögum eftir að námsmati er lokið.

Ég ætla ekki að leggja mikið meira upp úr neikvæðni í þesari færslu heldur ætla ég að leggja til ýmsar úrbætur í þessum málum.  Þessar úrbætur skipta miklu máli því að skilvirk kennsla á styttra tímabili er miklu betri heldur en hæg og langdregin kennsla á lengra tímabili.  Þá er dagvistun grunnskólanna stór og mikill þrándur í götu atvinnutækifæra unglinga, en ég er á þeirri skoðun að ungt fólk frá 14 ára aldri og upp úr eigi að fá betri tækifæri til að bæði læra að vinna og vinna sér inn peninga.      

Ég ætla að leggja fram nokkrar staðreyndir til grundvallar:

• Skóli var settur 22. ágúst síðastliðinn 
• Vetrarfrí var 3. og 6. nóvember með helgi á milli
• "Jóla"próf voru þreytt 27. - 30. nóvember síðastliðinn
• Fyrir jól var skóla slitið 20. desember  
• Vetrarfrí var 21. - 23. febrúar síðastliðinn 
• Samræmdu prófin voru þreytt 2. - 9. maí síðastliðinn
• Skólaprófin verða vikuna 29. maí til 1. júní næstkomandi
• Skólaslit eru 7. júní næstkomandi

Sökum þess hvaða tími ársins er þessa stundina ætla ég að byrja á að fjalla um atburði líðandi stundar.  Af þessum frumreglum má leiða að heilir 20 dagar eru millum samræmdu prófanna og skólaprófanna.  Þá er vika frá seinasta skólaprófi til skólaslita, þ.e. nemendur eru enn þá í skólanum þrátt fyrir að vera búnir með öll próf.  Við getum einnig gert okkur í hugarlund að efni samræmdu prófanna og skólaprófanna sé að langflestu leyti það sama.  Þá vakna náttúrulega upp spurningarnar er varða rökfræði þau er ákvarða þessa tilhögun skólastarfs.  Í fyrsta lagi, hvers vegna líður svo langur tími milli prófarunanna tveggja; og í öðru lagi, hvers vegna er nemendum skylt að sitja á skólabekk hafi þeir klárað allt það námsefni og þreytt öll þau próf sem lög um skólaskyldu gera ráð fyrir?

Væri ekki rökrétt að þessi próf væru í beinu framhaldi af hvoru öðru og þar með losna við áður nefnda 20 daga töf.  Meira segja má leiða líkur að því að útkoman út prófum sem haldin eru með því fyrirkomulagi sem ég legg til, komi betur út en það fyrirkomulag sem er við lýði í dag einfaldlega vegna þess að námsefnið er nemendum enn í fersku minni eftir samræmdu prófin.  Ef grundvallarstaðreyndunum er breytt á þann veginn líta þær svona út:         

• ...Samræmdu prófin voru þreytt 2. - 9. maí síðastliðinn
• Skólaprófin voru þreytt 10. -14. maí síðastliðinn
• Skólaslit voru 21. maí síðastliðinn

Það er vissa mín að litu grundvallarstaðreyndirnar svona út myndu þær falla hinum almenna borgara betur í geð heldur en núverandi grundvallarstaðreyndir.  Það væri samt betra að breyta þessum grundvallarstaðreyndum enn þá meira.  Það er auðveldlega hægt og með örlítilli viðbót.  Það þarf aðeins að breyta tveimur tölustöfum:

• Samræmdu prófin voru þreytt 2. - 9. maí síðastliðinn
• Skólaprófin voru þreytt 10. -14. maí síðastliðinn
• Skólaslit voru 16. maí síðastliðinn

Ef staðreyndirnar væru svona væri lífið þægilegra.  En ég hef alls ekki lokið máli mínu.  Nú ætla ég að fjalla um fyrripartinn af grundvallarstaðreyndunum.  Til upprifjunar skulum við líta á fyrripartinn:

• Skóli var settur 22. ágúst síðastliðinn 
• Vetrarfrí var 3. og 6. nóvember með helgi á milli
• "Jóla"próf voru þreytt 27. - 30. nóvember síðastliðinn
• Fyrir jól var skóla slitið 20. desember  
• Vetrarfrí var 21. - 23. febrúar síðastliðinn 

Fyrstu breytingarnar sem ég vil gera við þessar frumstaðreyndir eru á þann veginn að vetrarfríin tvö verði þurrkuð út.  Þar með má einnig færa skólasetninguna og prófin fram um 5 virka daga:

• Skóli var settur 29. ágúst síðastliðinn 
• Jólapróf voru þreytt 4. - 7. desember síðastliðinn
• Fyrir jól var skóla slitið 20. desember

En þar með er því ekki öllu lokið.  Skólaslitum fyrir jólafrí má auðveldlega færa aftur ásamt því að færa jólaprófin fram:

• Skóli var settur 29. ágúst síðastliðinn 
• Jólapróf voru þreytt 11. - 14. desember síðastliðinn
• Einkunnaafhending var 18. desember síðastliðinn[Föstudagur(Starfsdagur) og helgi á milli]

Þar með lítur heildarmyndin svona út:

• Skóli var settur 29. ágúst síðastliðinn 
• Jólapróf voru þreytt 11. - 14. desember síðastliðinn
• Einkunnaafhending var 18. desember síðastliðinn[Föstudagur(Starfsdagur) og helgi á milli]
• Samræmdu prófin voru þreytt 2. - 9. maí síðastliðinn
• Skólaprófin voru þreytt 10. -14. maí síðastliðinn
• Skólaslit voru 16. maí síðastliðinn

Ég vil vekja athygli á því að dagar sem fara í kennslu fyrir samræmd próf eru aðeins einum færri en í upprunalegu myndinni sem má finna hér að ofan, það er 19. desember, sem yfirleitt er ekki nýttur í stífa kennslu.  Þá vil ég ítreka það að sú mynd sem dregin er upp hér að ofan er eingöngu hugsuð fyrir unglingadeild(8. - 10. bekk) og þessi mynd er hluti af áætlun minni í stórbætum menntamála sem ég hyggst opinbera hér á næstu dögum, svo ég tali nú eins og stjórnmálamaður.  Myndin sem ég dró upp hér að ofan kemur að mörgu leyti heim og saman við þá skoðun mína að stofna ætti gagnfræðaskóla fyrir alla unglinga í stað þess að hafa unglingadeildir innan grunnskólanna.  En það er allt annar handleggur sem ég kem til með að fjalla um á næstunni.  Ég þakka lesturinn