Númer Eitt, Tvö & Þrjú

Nú stefnir allt í það að nýtt álver muni rísa á Keilisnesi, utan seilingar Hafnarfjarðarbæjar.  Álverið í Helguvíkinni mun að öllum líkindum auka enn á landsbyggðarflóttann sem  þó er alveg nógu mikill eins og hann er í dag.  Að byggja nýtt álver í bakgarði annars gamalgróins er fásinna sem ósköp fáum hugnast og miklu hagkvæmara væri að stækka álverið í Straumsvík og svala þar með atvinnuþorsta Suðurnesjamanna.  Eins og flestir vita eru jú, engar langleiðir á milli bæjarfélaganna á Reykjanesi og Hafnarfjarðar.  Við búum þó við þá staðreynd að álverið í Straumsvík mun ekki stækka á næstunni vegna dugleysis Samfylkingarinnar í stundarbrjálæði atkvæðalosta.

Að mínu mati er eini raunhæfi kosturinn að stækka álverið í Straumsvík.  Álverið á Keilisnesi er einfaldlega ekki samkeppnishæfur kostur við stækkun í Straumsvík.  Upp á síðkastið hefur mikið verið einblínt á Suðvesturhornið þegar kemur að atvinnusköpun.  Þurfum við alltaf að gera það?  Ég held ekki og í því er sitjandi ríkisstjórn sammála mér samanber Austfirðina.  Eigum við ekki að horfa næst til Húsavíkur?  Þar hefur gætt mikils höfuðborgarflótta og fyrirtækjarekstur gengur oft illa.  Má þar nefna að stærsta fiskvinnslufyrirtækið í bænum, Rækjan neyddist til að hætta rekstri og þurfti að segja upp 30 starfsmönnum. 

Þegar ákveðið var að skoða álver á Bakka fór áhrifa þess strax að gæta.  Sem dæmi má nefna að fasteignamat hverrar einustu fasteignar á Húsavík hefur að líkindum hækkað um eina milljón króna eftir að farið var að skoða möguleika á álveri þar.  Á Húsavík gætir lítillar sem engrar andstöðu gagnvart álverinu og í fyrsta skipti í langan tíma líta menn framtíðina björtum augum.  Á Húsavík spyrja menn "Hvers vegna ekki?"

Þegar við lítum á orkuna sem þarf til verksins er alveg ljóst að engra virkjana þarf við.  Jarðvarmi á svæðinu, Kröflu og Þeistareykjum gerir það að verkum að engu landi þarf að sökkva undir vatn.  Að mínu mati er álverið á Húsavík jafnvel betri kostur en stækkun í Straumsvík sem er betri kostur en álver á Keilisnesi.

Það er reyndar svo að Húsvíkingar eru ekki bundnir við álið.  Fyrir Húsvíkingum skiptir mestu máli að virkja jarðvarmann og þar með virkja atvinnulífið á svæðinu.  Jarðvarmann mætti þess vegna nýta til framleiðslu vetnis sem síðan myndi knýja vetnisbíla.  Þannig verksmiðja myndi samt ekki standa undir sér í dag.

Í stuttu máli sagt er álverksmiðja á Húsavík besti kosturinn að mínu mati en álver á Keilisnesi er sá sísti.  Maður á nefnilega að geta notið velferðarinnar á Íslandi í dag, jafnvel þó maður búi út á landi.